पागा कलगी-16//1//बंटी छतिसगढिया

ऐ रे परेवना जा
मोर भैया के देश रे
भैया हाबे आन देश
बहिनी मै आन रे
ले जा ले जा रे परेवना
मोर भैया बर संदेश रे
रदॣदा जोहत हाबे बताबे
बहिनी ससुरे देश मे
राखी के तिहार म भाई
ले वा के ले जा अपन देश रे
ऐ रै परेवना जा
मोर भैया के देश रे ।।।।
दाई ददा तिही रे भाई
तोर आश म आहू ग
तोर छोरे लहू के मै
तोला कईसे भूलाहू ग
मोर भरोसा तिही भैया
राखी के फरज निभाबे
हाबे अगोरा ऐ ग भैया
मोला अपन देश
ले वा के ले जाबे
ऐ रे परेवना जा
मोर भैया के देश रे
भैया ल कहि दे बे संदेश ।।।
तोर बहिनी बेटी हो भाई
तिही मोर महतारी ग
तोर कोरा म खेले बाढे
तिही पराये भावर
मोर घर दुवारी बसाये भाई
मोला ले वा के जा भाई
तोर अगोरा हाबे मोला
तिही मोर ददा दाई
ऐ रे परेवना जा
मोर भैया के देश
भैया ल दे देबे संदेश ।।।।
++++++++++++++++++++++

गलती होही क्षमा करहू ग
मै नवसिखिया नादान
क्षमा करे जे भगवान बरोबर
क्षमा करे ते महान ।।।।

बंटी छतिसगढिया
पिथौरा 493551

//पागा कलगी 16 के रूपरेखा//

//पागा कलगी 16 के रूपरेखा//

अवधि-16 अगस्त16 से 31 अगस्त तक

विषय- दे गे चित्र के अनुसार
संचालक- श्री आचार्य तोषण चुरेन्द (पागा कलगी-7 के विजेता)

निर्णायक-श्री दीनदयाल साहू, सहायक संपादक चौपाल, हरिभूमि
श्री राजकमल राजपूत वरिष्ठ साहित्यकार, थानखम्हरिया बेमेतरा

नियम-छत्तीसगढ़ी कविता के प्रतियोगिता पागा कलगी 15 के रचना सीधा छत्तीसगढ़ी मंच मा पोष्ट करना हे । जेन रचनाकार छत्तीसगढ़ी मंच के सदस्य नई हे, ओ एडमिन मन के व्यक्तिगत वाटशॅंप म भेज सकत हंे । कानो सार्वजनिक वाटशाॅप/फेसबुक समूह से रचना नई देना हे । प्रतियोगिता अवधि तक प्रतियोगिता के रचना केवल फेसबुक समूह छत्तीसगढ़ी मंच अउ ब्लाग पागा कलगी भर म होही । यदि रचना अंते तंते पाये जाही त रचना ला प्रतियोगिता से बाहिर कर दे जाही ।

विधा - अइसे विधा के बंधन नई हे, फेर काव्य के कोनो विधा मा रचना दैं त विधा के संक्षिप्त जानकारी रचना के पहिली दू डांड म देवंय त जादा अच्छा रहिही । जेखर ले नवा रचनाकार मन ओ विधा ला आत्मसात कर सकय । विधा के ज्ञान नई होय त विधा के नाम मत देवंय ।
विशेष- रचना हर स्थिति म चित्र ला शब्द देवत होय, विषय ले भटके रचना ला अमान्य कर दे जाही ।
प्रतिभागी रचना छत्तीसगढ़ी मंच ला छोड़ के अंते पोष्ट नई करना हे ।

पागा कलगी-15 //29//आशा देशमुख

| देश बर जीबो देश बर मरबो |

बैरी बैरी सब कथे ,असली बैरी कौन |
घर मा बइठे भेदिया ,देश ल बेचय जौंन ||

ये माटी चंदन अय भइया ,माथ म अपन लगावव |
पहली तो घर के बैरी ला ,कसके धूर चटावव |

जेन करय दाई के सौदा ,वो सपूत का होही |
मुड़ी मुड़ाके गली घुमावव ,तर बत्तर वो रोही |

ज्ञान रतन भंडार भरे हे ,ये भारत भुंइया मा |
रहना चाहे सब दुनियाँ हा , येकर गा छइहाँ मा |

आगी बर आगी बन जावव ,पानी बर गा पानी |
झन करन देवव अब बैरी ल ,अपन इहाँ मनमानी |

भारत भुइयाँ के सब लइका , सब मिल मान बढ़ावव |
एकर रक्षा के खातिर सब,सरबस अपन लुटावव |

ये धरती मा जनमे हावे ,सरग के जम्मो देवता |
जइसे लागे पाये हावे,झारा झारा नेवता |

जतका इहाँ जयचंद लुकाए,खोज खोज के मारव
इकर बंधना ले धरती ला ,सब मिल के मुक्तावव |

ये दाई झन कर तै चिंता ,तोरे सेवा करबो |
तोरे अंचरा मा हम जीबो ,तोर पँउरी म मरबो |

, जय हिन्द जय भारत,

आशा देशमुख
एनटीपीसी जमनीपाली कोरबा
छत्तीसगढ़

पागा कलगी-15//28// ललित वर्मा,"अंतर्जश्न"

बिसय: देस बर जीबो देस बर मरबो

देस बर जीबो देस बर मरबो, देस ल जबर बनाबो रे
बीते बरस के जगतगुरू ल,फेर पागा पहिराबो रे

ललकारत हे पाकिस्तान,चीन खडे हे छाती तान
कस्मीर अउ अरूनाचल म, जबरन बईठे हे बेईमान
अईसन सांप-छछूंदर मन ल, कूचर-कूचर के जलाबो रे
देस बर जीबो देस बर मरबो, देस ल जबर बनाबो रे

हुतकारत हे आज परधान, फूफकारत हे गबरू-जवान
जुरमिल देस ल टीप लेगेबर, जबर जोस संग धरे कमान
अईसन देस के अघुवा मन ल, कांध-मुडी म चढाबो रे
देस बर जीबो देस बर मरबो, देस ल जबर बनाबो रे

गडियाथे झंडा मंगलयान, सहराथे दुनिया के बिग्यान
ब्रम्होस हे ब्रम्हास्त्र बरोबर, बोफोर्स धरे हे अग्निबान
अईसन देस के गरब हवय त, काबर नई इतराबो रे
देस बर जीबो देस बर मरबो,देस ल जबर बनाबो रे
बीते बखत के जगतगुरू ल, फेर पागा पहिराबो रे

रचना:- ललित वर्मा,"अंतर्जश्न" 

छुरा

पागा कलगी-15//27//सुखदेव सिंह अहिलेश्वर

देश बर जीबो देश बर मरबो

आवव जुरमिल इही परन करबो,
देश बर जीबो देश बर मरबो।

कुकरा बासत नांगर धर जाबो,
खेती किसानी जांगर भर कमाबो।
सोनहा अन्न उपजाये खातिर,
धरती दाई के सेवा करबो।
भूंख गरीबी ल दुरिहा करे बर,
आवव संगवारी कमर कसबो।
देश बर जीबो देश बर मरबो।

आधा दिन हम जनता कर जाबो,
जनता जनार्दन के अशिष पाबो।
जेकर वोट से मंतरी बने हन,
ओकर किरपा करजा उतारबो।
समस्या ल उंकरो हल करे बर,
जोहारे चिट्ठी थइल म धरबो।
देश बर जीबो देश बर मरबो।

तोर उपर आंच नई आवन दन,
सरहद म मां तोर लाल खड़े हन।
दुश्मन मुड़ी टकराके फुट जही,
पहाड़ के पथरा सरिक अड़े हन।
देश के माटी के रक्षा खातिर,
बैरी के टोंटा म हाथ धरबो।
देश बर जीबो देश बर मरबो।

राष्ट्र निर्माता के उपाधी संग,
शिक्षा के भार भरोस खांध मढ़ाय हन।
शिक्षक के आदर मान संग,
नमस्ते गुरूजी के सम्मान पाय हन।
नवा पीढ़ी के उज्जवल रद्दा बर,
ज्ञान जोरन उंकर हांथ म धरबो।
देश बर जीबो देश बर मरबो।

आवव जुरमिल इही परन करबो,
देश बर जीबो देश बर मरबो।

रचना:-- सुखदेव सिंह अहिलेश्वर
गोरखपुर,कवर्धा

पागा कलगी-15//26//डोल नारायण पटेल

संगी जंवरिहा भाई बहिनी अउ जम्मो मितान जी,
अउ जम्मो मितान जी ।
मई बाप अउ लोगन लइका आवा सबो सियान जी,
आवा सबो सियान जी ।
बेरा हावे जुरमिल के सब, बेरा हावे जुरमिल के सब,
एक परन ला करबो जी, देश बर् जीबो जी देश बर् मरबो जी ।
सुघ्घर सुघ्घर भारत मैय्या के अंचरा हर धानी हावे,
के अंचरा हर धानी हाव ।
अन्न पानी के एकर अमृत दुनिया के महारानी हावे,
दुनिया के महारानी हाव ।
माटी के महिमा देवतन गाईन, माटी के महिमा देवतन गाईन ।
धुर्रा मुड़ मा धरबो जी, देश बर् जीबो जी देश बर् मरबो जी ।
भारत भुइंया के महिमा ला तुलसी बबा हर गाईन हे, तुलसी बबा हर गाईन हे ।
कोरा एखर गंगा बहथे धैन धैन एला बताइन हें, धैन धैन एला बताइन हें ।
धरम थापैया राम किशन के, धरम थापैया राम किशन के ।
कहे डगर मा चलबो जी, देश बर् जीबो जी देश बर् मरबो जी ।
हिन्दू मुस्लिम सिक्ख इशाई जम्मो बहिनी जम्मो भाई, जम्मो बहिनी जम्मो भाई ।
भारत माता के लइका हावन एके हावे सबके माई, एके हावे सबके माई ।
रकम रकम के फुलवा होके, रकम रकम के फुलवा होक ।
हरबा एके गढ़बो जी, देश बर् जीबो जी देश बर् मरबो जी ।
सबो तिरंगा लेके आवा आगू बढ़ते जाना हे, आगू बढ़ते जाना हे ।
बन्दे मातरम् बन्दे मातरम्, बन्दे मातरम् गाना हे,
बन्दे मातरम् गाना हे ।
एक डोरी मा बंध के रहिबो, एक डोरी मा बंध के रहिबो ।
काकरो ले नई दरबो जी, देश बर् जीबो जी देश बर् मरबो जी ।
धरम जात के कोनो झगरा में हमला नई परना हे, में हमला नई परना हे ।
गौतम गांधी अउ भगत के थाथी जतन ले धरना हे, थाथी जतन ले धरना हे ।
टेड़गा देखयेया के छाती मा, टेड़गा देखयेया के छाती मा ।
गोला बनके परबो जी, देश बर् जीबो जी देश बर् मरबो जी ।
जौन देश मा जनमेंन बाढ़ेन खेलेंन् कूदेंन् खाएन जी, खेलेंन् कूदेंन् खाएन जी ।
भारतवासी कहलाएंन् अउ अड़बड़ सुख ला पायेन जी, अड़बड़ सुख ला पायेन जी ।
ओकर मान ला राखै खातिर, ओकर मान ला राखै खातिर ।
जिंदगी अर्पन करबो जी, देश बर् जीबो जी देश बर् मरबो जी ।
-
/
डोल नारायण पटेल
तारापुर - रायगढ़ छ0ग0

पागा कलगी-15//25//गुलाब सिंह कंवर "गुलाब "

तुलसी ,संत रविदास मीरा
गौतम नानक अउ कबीरा

किशन कन्हैया मथुरा म जनमीन
अवध पुरी रघुवीरा...

देवी देवता के धाम इहाँ
भीड भडक्का भारी .....
देस बर जीबो देस बर मरबो
जाऔ मैं बलहारी ......

इहाँ खेत खलिहान हे
गहू बाजरा धान हे
मेहनती मजदूर किसान इहाँ
संग संगवारी मीतान हे

कोदो कुटकी राहेर तिवरा
लगे हावय उन्हारी ........
देस बर जीबो देस बर मरबो
जाऔ मैं बल हारी .....

आनी बानी के बोली भाखा
धरम पंथ के अबड शाखा
मिलके सब रिथन इहाँ
न अड़चन ..न ..कोनो बाधा

अनेकता म एकता हमर
भारत के हावय चीन्हारी ....
देस बर जीबो देस बर मरबो
जाओ मैं बलहारी .......
******************************
गुलाब सिंह कंवर "गुलाब "
मा .शा .-नवापारा
खरसिया
जिला -रायगढ़ छ .ग .