पागा कलगी-14/4/टीकाराम देशमुख "करिया'

" मंहु ल ढेंकी कूटन दे "

मंहु ल ढेंकी कूटन दे ओ दीदी......
मंहु ल ढेंकी कूटन दे
हमर मइके डाहर ये ह नंदागे
आज मोर संऊख ल पूरन दे ओ दीदी
आज मोर संऊख ल पूरन दे
मंहु ल ढेंकी कूटन दे.............

१.नानपन मं घर में देखे रेहेन ढेंकी,
ऐति मस्कय, त ओती उठय
बड़े बिहनियां ले साँझ रतिहा तक,
दू खांड़ी धान ल कुटय |
आजी अऊ फुफू के करे बुता ल...
मंहु ल आज सीखन दे ओ दीदी
मंहु ल आज सीखन दे
मंहु ल ढेंकी कुटन...............

२.आगे जमाना नवां , नवां मशीन घलो ह आगे
थोरिक समे मं धान दराथे,पिसान झट ले पिसाथे
तईहा के गोठ ल ,बईहा लेगत हे....
चिटिक चंऊर ल मोला छरन दे ओ दीदी
चिटिक चंऊर ल मोला छरन दे
मंहु ल ढेंकी कुटन..............

३. राहय मइके घर मं जांता, पथरा कते तनी फेंका गे
बाहना घलो छबागे ओ दीदी ,मुसर पठंऊहा मं टंगागे
गजब समे मं मऊका मिले हे...
डांडी़ ल मोला मसकन दे ओ दीदी
मंहु ल थोकिन देखन दे

मंहु ल ढेंकी कुटन ..................

© टीकाराम देशमुख "करिया'
स्टेशन चउक कुम्हारी ,जिला_दुरुग
मो._९४०६३ २४०९६

पसंद करें

पसंद करें

बहुत पसंद

हा हा

वाह

उदास

गुस्सा

टि

पागा कलगी-14 /3/आचार्य तोषण

शीर्षक:-ढेंकी
(१) 
कहनी मोर अजब । सुन कहिबे गजब
बेटा अऊ महतारी । रहय एक दुवारी
(२)
लइका कथे मोला । भुख मरे चोला
दाई देदेन भात । मोला तात तात
(३)
चऊंर नीहि घर । कइसे डारंव कर
खाली पेट सुत । जलदी जबे उठ
(४)
जाबो धान कुटाय । सबले रबो अघुवाय
दूरिहा गांव ढेंकी । कहाथों बात नेकी
(५)
होत बिहिनिया जोरा। धरे धान बोरा
आमा लीम छांव। पहुंचिन दूर गांव
(६)
जांगर पिरागे जोर । चेत होगे थोर
भीड़ देखय मजबूरी। कुटाना घलक जरूरी
(७)
कब आबे पारी । सोंचय मोर महतारी
बिहनिया होवय सांझ। डरबो कब रांध
(८)
एक खांड़ी धान । कुटाही कतिक जान
देखत हावय दाई । मोर होगे करलाई
(९)
पारी आगे कुटय । चऊंर फोकला छुटय
कुकरा बोलय कुकरूस। ढेंकी करय भुकरूस
(१०)
जइसे कुटाय धान । चेहरा छइस मुसकान
रद्दा चलिस धर । पहुंचिस अपन घर
(११)
चऊंर डरिस निमार । संग ओइरिस दार
चुरय दार भात । खावय दुनो तात
(१२)
खाए पिए सुतगे । मोर कहनी पुरगे
तोषन बजाय तबला। राम राम सबला
(१३)
रचना रचे तोषण। संगवारी जेकर पोषण
मे हरंव शिक्षक। बनगे ओहर चिकित्सक
========================
आचार्य तोषण,धनगांव डौंडीलोहारा
बालोद, छत्तीसगढ़ ४९१७७१

पागा कलगी-14/2/राजेश कुमार निषाद

जब ले मशीनी युग ह आये हावय
नंदागे हावय घर घर के ढेकी।
जेमा चाउंर ल कुटय
अऊ रांधय अईरसा रोटी।
धानकुट्टी मिल के नई राहय ले
धान ल येमा कुटय।
रेंच रेंच ढेकी बाजय
डोकरी दाई चाउंर ल फुनय।
ढेकी गढ़े राहय घर के दुवारी
जेमा गुण हावय बड़ भारी।
बचे मैरखु ल फिर से कुटथे
मेहनत जादा हे कहिथे।
फेर जब ले मशीन आय हावय
ढेकी के काम नंदागे।
सब काम मशीन म जल्दी होथे
बस दो मिनट काहत लागे।
जेकर घर ढेकी राहय
ओकर घर पारा पड़ोस के मन आवय।
सब अपन अपन धान ल कुटय
पर ढेकी के गुण ल गावय।
ढेकी घर के दुवारी के
अब हिस्सा होगे हावय।
अब के लईका मन बर
कहानी अऊ किस्सा होगे हावय।

रचनाकार राजेश कुमार निषाद
ग्राम चपरीद पोस्ट समोदा तह. आरंग जिला रायपुर छत्तीसगढ़

पागा कलगी 13 के परिणाम

विषय-‘‘‘माटी के मितान’’

मंच संचालक- श्री हेमलाल साहू, सदस्य छत्तीसगढ़ मंच संचालक समीति

निर्णायक-1.श्री अंजनी कुमार ‘अंकुर‘, वरिष्ठ साहित्यकार, रायगढ़

2. श्रीमती शकुंतला शर्मा ,वरिष्ठ साहित्यकार, दुर्ग

संगी हो,

सबले पहिली आप सब ला ये आयोजन म हिस्सा ले बर आभार । आप सबके सहयोग ले हमर साहित्य निश्चित रूप ले आघू बढ़ही । सबो झन विजेता नइ हो सकन । लेकिन कोनो रचना बेकार नई होवय, कोनो मेहनत निरर्थक नई होवय । आप सबला अच्छा रचना लिखेबर बधाई ।

परिणाम घोषित करे के पहिली एक बात के निवेदन आप सब से करना चाहत हंव हमर देश म ‘पंच परमेश्वर‘ कहे गे हे । कोनो निर्णय करना आसान नई होवय । सबके अपन सोच अपन कसौटी होथे, निर्णायक ऊपर अविश्वास नई करना चाही ।

ये आयोजन के पहिली, दूसर अउ तीसर विजेता के संगे संग प्रशंसनीय रचना घोषित करे जात हे -

आदरणीय मन के निर्णायक के अनुसार -

पहिली विजेता-

डॉ.अशोक आकाश बालोद

दूसर विजेता-

श्री महेन्द्र देवांगन "माटी"

गोपीबंद पारा पंडरिया
जिला -- कबीरधाम

तीसर विजेता-

श्री ललित साहू "जख्मी"

ग्राम- छुरा
जिला- गरियाबंद (छ.ग.)

प्रशंसनीय रचना- 

1- चैतन्य जितेन्द्र तिवारी
थानखम्हरिया(बेमेतरा)

2-तरूण साहू " भाठीगढ़िया "

ग्राम - भाठीगढ़
तहसील - मैनपुर
जिला - गरियाबंद ( छत्तीसगढ़)

सबो विजेता संगीमन ला छत्तीसगढ़ी मंच अउ छत्तीसगढ़ के पागा कलगी के संचालक समीति डहर ले बहुत-बहुत बधाई ।

पागा कलगी-14/1/ गोपी मनहरे

अंतरा। ढेकी के कुटईया अऊ कोदो धान के छरईया
तोर जय होवव ओ ढेकी के कुटईया -2

पद। (1)मचत ढेकी कुटय धान बड़ सुहावन लागय
कोदो फुटकी अन के दाना देखत मन ह भावय

लय। अब नंदागे मुसर ढेकी सिरतो म भईया
तोर जय होवय ओ.............

पद।(2)इही ढेकी म कुटके गौरी भोला ल भोजन करावय
पेट भरहा खाके भोला मने मन मुस्कावय

लय। सिरतो मगन होगे जी भोला अवघड़िया
तोर जय होवय ओ..........

पद। (3)माथ नवावव ढेकी कुटईया के जेन कुटे कोदो धान
ढेकी कुटईया दाई मोर तोला डण्डा सरन परनाम

लय। रचना रचे हे संगी गोपी मनहर बेमेतरीहा
तोर जय होवय ओ............

ढेकी के कुटईया अऊ कोदो धान के छरईया
तोर जय होवय ओ ढेकी के कुटईया

जय जोहार

रचना - गोपी मनहरे
गांव - पथरपूंजी। बेरला
जिला- बेमेतरा
वाटसाप नं: 9098519146

//पागा कलगी-14 के रूपरेख //

नियम-छत्तीसगढ़ी कविता के प्रतियोगिता पागा कलगी 14 के रचना सीधा छत्तीसगढ़ी मंच मा पोष्ट करना हे । जेन रचनाकार छत्तीसगढ़ी मंच के सदस्य नई हे, ओ एडमिन मन के व्यक्तिगत वाटशॅंप म भेज सकत हंे । कानो सार्वजनिक वाटशाॅप/फेसबुक समूह से रचना नई देना हे । प्रतियोगिता अवधि तक प्रतियोगिता के रचना केवल फेसबुक समूह छत्तीसगढ़ी मंच अउ ब्लाग पागा कलगी भर म होही । यदि रचना अंते तंते पाये जाही त रचना ला प्रतियोगिता से बाहिर कर दे जाही ।

प्रतियोगिता अवधि- 16 जुलाई 2016 से 31 जुलाई 2016

परिणाम घोषणा- 5 अगस्त 2016 तक (यथा संभव)

मंच संचालक - श्री संतोष फरिकर (पागा कलगी -5 के विजेता)

निर्णायक-डां.प्रो. चंद्रशेखर सिंह, वरष्ठि साहित्यकार, मुंगेली
सेवानिव्त प्राचार्य श्री कुष्णकुमार भट्ट ‘पथिक‘, वरिष्ठ साहित्यकार बिलासपुर

प्रतियोगिता के विषय- दे गे चित्र ले विषय के चयन करके

विधा - अइसे विधा के बंधन नई हे, फेर काव्य के कोनो विधा मा रचना दैं त विधा के संक्षिप्त जानकारी रचना के पहिली दू डांड म देवंय त जादा अच्छा रहिही । जेखर ले नवा रचनाकार मन ओ विधा ला आत्मसात कर सकय । विधा के ज्ञान नई होय त विधा के नाम मत देवंय ।
विशेष- रचना हर स्थिति म चित्र ला शब्द देवत होय, विषय ले भटके रचना ला अमान्य कर दे जाही ।

पागा कलगी-13/43/ओमप्रकाश चौहान

🌻 माटी के मितान 🌻
""""""""""""""""""""""""""""""""""""

नांगर बइला हे संग
मोहनी बाते हे बरंग,
खुमरी साजे रे परिधान
तहीं माटी के मितान।2।

सुग्घर खेतीखारे हे संग
सोनहा बाली के हे रंग,
बोझा लादे रे महान
तहीं माटी के मितान।2।

भूख पियास के हे संग
सावन भर हे तोर मन,
सुग्घर माटी के रे तन
तहीं माटी के मितान ।2।

सबले पोख्खा श्रमदान
का भगमानी करे किसान
जग बंदन करय महान,
तहीं माटी के मितान ।2।

सुकुवा चलय संगे संग
तय मुंधरहा के सुग्घर उमंग,
तोर देस म हे बड़ मान
तहीं माटी के मितान ।2।

🌻ओमप्रकाश चौहान 🌻
🌴 बिलासपुर 🌴