पागा कलगी-15/3/राजेश कुमार निषाद

।। देश बर जीबो संगी देश बर मरबो ।।
भारत मां के बेटा हरन
देश बर जीबो संगी देश बर मरबो।
देश की रक्षा करे खातिर
बईरी मन से लड़ जाबो।
देश ल आजाद कराये खातिर
पुरखा गोली खाईस अपन छाती म।
नव जवान लईका सियान
सब हांसत झुलगे फाँसी म।
फेर हमन काबर पछुआबो
भारत मां के बेटा हरन
देश बर जीबो संगी देश बर मरबो।
जेन देश ह हमर देश बर आंखी उठाही
ओला हमन चुर चुर कर जाबो।
चाहे आंधी आही या तूफान आही
पर हमन नई घबराबो।
देश ल अजाद करईया पुरखा के
सुरता ल हमन गाबो।
भारत मां के बेटा हरन
देश बर जीबो संगी देश बर मरबो।
गांधी भगत के कुरबानी ल
कईसे हमन भुलाबो।
जब तक रही सांस हमर
बईरी ल मार भगाबो।
तीन रंग के तिरंगा झंडा
मिलके हमन फहराबो।
भारत मां के चरण म
माथ अपन नवाबो।
भारत मां के बेटा हरन
देश बर जीबो संगी देश बर मरबो।

रचनाकार ÷ राजेश कुमार निषाद
ग्राम चपरीद ( समोदा )
9713872983

पागा कलगी-15 ./2/आचार्य तोषण चुरेन्द्र

शीर्षक:-देश बर जीबो देश बर मरबो
●
आही बइरी संऊहत आघु ओकरसे हकनके लड़बो 
जनम धरेहन देश के खातिर देश बर जीबो देश बर मरबो
●
अईस एक दिन अंगरेजी शासन देश म अत्याचार करिन
बन बइरी के दास देश ह कल्हर कल्हर हाहाकार करिन
करय निशचय भारत के बेटा कब तक पांव ल परबो
जनम धरेहन देश के खातिर देश बर जीबो देश बर मरबो
●
सन सनतावन म मंगल ह क्रांति के बिगूल बजाइस हे
भगत सुकदेव राजगुरू सब जुरमिल के सकलाईस हे
अपन स्वाधीनता के मान खातिर कहे सुली हम चढबो
जनम धरेहन देश के खातिर देश बर जीबो देश बर मरबो
●
वीर शिवाजी तात्या लछमी अंगरेज के बुता बनाइस
दूर करे अंगरेजी शासन अपन जिनगी ल दाव लगाइस
तिलक गोखले प्रताप जइसन छाती ल हमू अकडबो
जनम धरेहन देश के खातिर देश बर जीबो देश बर मरबो
●
गांधी सुभाष आजाद बिस्मिल दांव खेले अपन प्राण के
भारत भुंइया के रकछा करेबर निकले छाती तान के
स्वतंत्रता के लहरात तिरंगा हांथ म अपन पकड़बो
जनम धरेहन देश के खातिर देश बर जीबो देश बर मरबो
●
अमर शहीद बलिदानी मनके सपना एक दिन रंग लाईस
आईस पारी सन सडतालीस में हमर देश अजादी पाईस
ये भारत के अमर पुत्र बर सुघ्घर जयकारा करबो
जनम धरेहन देश के खातिर देश बर जीबो देश बर मरबो
●
अजाद होके अजाद नंइहन हम अजाद ये भारत म
एक दूसर ल कांटय बोंगय जिनगी के सुख स्वारथ म
ऊंच नीच के खंचवा म सुंनता के माटी सबडबो
जनम धरेहन देश के खातिर देश बर जीबो देश बर मरबो

●भारत माता की जय●
●रचना●
●आचार्य तोषण चुरेन्द्र●
●धनगांव डौंडीलोहारा●
●बालोद छत्तीसगढ़●

पागा कलगी-15 /1/गोपी मनहरे

अंतरा -जोरे जोरे हाथ चलबो एके बाट भारत माता बर कछु करबो जी
देश बर जीबो संगी देश बर मरबो जी

पद(1)राजगुरू भगतसिंह अऊ चन्द्रशेखर आजाद
भारत देश बर मर मिटगे राजा गुरू बालकदास

लय-बाबा साहब अम्बेडकर कस सविधान गड़बो जी
देश बर जीबो संगी...........

पद(2)झांसी के रानी लक्ष्मीबाई मदर टेरेसा माई
जन जन म मान बड़हाय इन्द्रागांधी मिनी माता दाई

लय-सरोजनी नायडू अवन्ती बाई के गुन गाबो जी
देश बर जीबो संगी........

पद(3)करव परनाम मय जोरे जउन देश बर होगिस कुर्बान
गाथा गावव मान बड़हावव सबो हवय मोर बर भगवान

लय-पागा कलगी 15 बर सबो रचना गड़बो जी
देश बर जीबो संगी .............

रचना-गोपी मनहरे
गांव-पथरपूंजी बेरला
जिला-बेमेतरा

पागा कलगी-14 /25/डां अशोक आकाश

मैंरखू ला ढेंकी थुरथे.....
धान ला कुट के चाऊंर बनाथे , मैरखू ला ढेंकी थुरथे ।
कब तक लद्दी में बोजाय रहिबे , घुरुवा के दिन बहुरथे ।।
लात में मारथे नाली में फेंकथे , तेन ला लछमी फुरथे ..........
मैरखू ला ढेंकी थुरथे .......
पोसन नी सके तेकर घर होय , लैका झोरफा-झोरफा ।
लैका बर तरसथे तेकर घर में , होथे धन के बरसा ।।
ये दुनिया में अन्न उपजैय्या , किसान हा भूखों मरथे ........
कब तक लद्दी मे बोजाय रहिबे ,घुरुवा के दिन बहुरथे ।
मैरखू ला ढेंकी थुरथेे.........
तेली के घर में डबका चुरथे , सोनकर मरार घर सरहा जुरहा ।
गुरूजी के लैका गदहा निकलथे , पुलिस के लैका चोरहा ।।
साधू सज्जन मैनखे देख के , उलटा छूरा मुडथे ।।
कब तक लद्दी में बोजाय रहिबे , घुरुवा के दिन बहुरथे ।
मैरखू ला ढेंकी थुरथे .......
कपड़ा बेचैया के लैका मन हा , नी पहिने गा जुनहा ।
अन्न उपजैय्या किसान ला होथे , एकक दाना सोनहा ।।
एकर तन ला खाय पसीना , पथरा हा नून में घुरथे ।।
कब तक लद्दी में बोजाय रहिबे , घुरुवा के दिन बहुरथे ।
मैरखू ला ढेंकी थुरथे .......
दर्जी के लैका उघरा गिंजरथे , डांक्टर के लैका घौहा ।
जेन ला हम पांच साल बर चुनथन , तेकर नै हे दौहा ।।
घी हा सीधा में नै निकले , टेंडगा अंगरी निकलथे ।
जरे के पहिली मरे सांप हा , घलो ठाढ उछलथे ।।
बडे - बडे बाम्हन के घर में , कुकरा मछरी चुरथे ।
ये दुनिया के रीत हे उलटा , गुन - गुन के मन घुरथे ।।
कब तक लद्दी में बोजाय रहिबे , घुरुवा के दिन बहुरथे ।
मैरखू ला ढेंकी थुरथे .........
डां अशोक आकाश
ग्राम कोहंगाटोला बालोद
जिला बालोद (छ.

//पागा कलगी-15 के रूपरेख //

नियम-छत्तीसगढ़ी कविता के प्रतियोगिता पागा कलगी 15 के रचना सीधा छत्तीसगढ़ी मंच मा पोष्ट करना हे । जेन रचनाकार छत्तीसगढ़ी मंच के सदस्य नई हे, ओ एडमिन मन के व्यक्तिगत वाटशॅंप म भेज सकत हंे । कानो सार्वजनिक वाटशाॅप/फेसबुक समूह से रचना नई देना हे । प्रतियोगिता अवधि तक प्रतियोगिता के रचना केवल फेसबुक समूह छत्तीसगढ़ी मंच अउ ब्लाग पागा कलगी भर म होही । यदि रचना अंते तंते पाये जाही त रचना ला प्रतियोगिता से बाहिर कर दे जाही ।
प्रतियोगिता अवधि- 1 अगस्त 2016 से 15 अगस्त 2016
परिणाम घोषणा- 20 अगस्त  तक 2016 तक (यथा संभव)
मंच संचालक - श्री मिलन मलरिहा पागा कलगी - 6 के विजेता)
निर्णायक-श्री तुकाराम कंसारी, संपादक राजिम टाइम्स
श्री देवेन्द्र परिहार, प्रख्यात राष्ट्रवादी, राष्ट्रीय कवि
प्रतियोगिता के विषय- ‘देश बर जीबो देश बर मरबो‘
विधा - अइसे विधा के बंधन नई हे, फेर काव्य के कोनो विधा मा रचना दैं त विधा के संक्षिप्त जानकारी रचना के पहिली दू डांड म देवंय त जादा अच्छा रहिही । जेखर ले नवा रचनाकार मन ओ विधा ला आत्मसात कर सकय । विधा के ज्ञान नई होय त विधा के नाम मत देवंय ।
विशेष- रचना हर स्थिति म विषय ला शब्द देवत होय, विषय ले भटके रचना ला अमान्य कर दे जाही ।
प्रतिभागी रचना छत्तीसगढ़ी मंच ला छोड़ के अंते पोष्ट नई करना हे ।

पागा कलगी-14/13/देवेन्द्र कुमार ध्रुव

शीर्षक -ढेकी बर दोहा
दोहा कही पारे हो गलती ला आप जरूर बताहू

ऐहा थाती ऐ हमर,पुरखा के सिरजाय।
ऐमा अनाज ला कुटय,तब सब जेवन पाय ।।
आरो ढेकी के सुनय,दाई मन सब आय।
सुख दुख के जी गोठ, संगे मा चल जाय।।
घर घर मड़िया हा चुरय,कोदो कुटकी खाय।
ढेकी हा जेला दरय,सबला अबड़े भाय।।
पाटा लकड़ी के झुलय,थुनिहा घला गड़ाय।
ढेकी हा बाजत रहय,जइसे गाना गाय।।
मसीन के दुनिया हरय, आनी बानी ताय।
बेरा के जी संग मा,बदलत सब हा जाय।।
ढेकी कुरिया कोति अब,कोनो नइतो जाय।
काही नइये अब जतन,जावत हे नंदाय।।
कोनो उदीम अब करव,दुरिहा ऐ झन जाय।
सुरता ऐकर मत भुलय,मन मा ऐ
बस जाय।।

रचना
देवेन्द्र कुमार ध्रुव (डी आर)
फुटहा करम बेलर
जिला गरियाबंद *छग*

पागा कलगी-14 /24/हीरालाल गुरुजी"समय"

‪#‎ढेंकी_सिखाते_प्रभु_धियान‬

एक दिन अपन आजी गांव म
नोनी एक कुरिया म गिस
उहां रखाय छै फुट के गोला
अकबका गे जब वो दिखिस
अपन आजी ध पूछिस

कुरिया म रखाय जिनीस काये बतादे
हमर जिनगी म का काम आथे सिखादे

आजी बतईस ये गोला नोहय बेटी,
ये हमर अनपूरना माता हरे ,ढेकी
आगू म रथे मूसर पाछू रथे पाई
पाई ल गोड़ म चपकबे तब
आगू मुड़ी उठाही

गोड़ ल उठाबे तब
बाहना म फेर जाही
घेरी बेरी अईसने करबे ,तब
मेरखू ह कुटाही

ढेकी के अड़बड़ महत्तम हे
ढेकी देथे अड़बड़ गियान हे
ढेकी सिखाथे परभू धियान हे
ढेकी म छिपे बिगयान हे

ढेकी म अऊ का करथे
मोला तैं बतादे आजी
संउहत करके ओमे काम
मोला आज देखादे आजी

ढेकी म मेरखू छरे जाथे
जेखर ले धान चउंर हो जाथे
कोदो कुटकी ल कुटथे
तब खायबर दाना फूटथे

अइसने अड़बड़ जिनीस ल कुटे के काम आथे
कुटइया ह तब खाय के दाना पाथे

नोनी के मन गावत हे
अऊ सुने बर भावत हे
आजी भगवान के
धियान के गोठ बतादे
मोर असुसी ल बुतादे

गोठ बात करत करत
धान ल छरत छरत
दुखीसुखी गोठियात
लइका ल पियात खवात
मेरखू ल खोवत हों
धियान देके सुन बेटी
गियान के बात सिखोवत हों

सब काम करत करत
ढेकी के मूसर के रथे धियान
वइसने ये माया म जिनगी काटत
भगवान में मन ल टेकान

ढेंकी के कतका करों बखान
ढेंकी सिखाथे प्रभु के धियान

रचना - हीरालाल गुरुजी"समय"
नगर - छुरा गरियाबंद