एक दिन अपन आजी गांव म
नोनी एक कुरिया म गिस
उहां रखाय छै फुट के गोला
अकबका गे जब वो दिखिस
अपन आजी ध पूछिस
नोनी एक कुरिया म गिस
उहां रखाय छै फुट के गोला
अकबका गे जब वो दिखिस
अपन आजी ध पूछिस
कुरिया म रखाय जिनीस काये बतादे
हमर जिनगी म का काम आथे सिखादे
हमर जिनगी म का काम आथे सिखादे
आजी बतईस ये गोला नोहय बेटी,
ये हमर अनपूरना माता हरे ,ढेकी
आगू म रथे मूसर पाछू रथे पाई
पाई ल गोड़ म चपकबे तब
आगू मुड़ी उठाही
ये हमर अनपूरना माता हरे ,ढेकी
आगू म रथे मूसर पाछू रथे पाई
पाई ल गोड़ म चपकबे तब
आगू मुड़ी उठाही
गोड़ ल उठाबे तब
बाहना म फेर जाही
घेरी बेरी अईसने करबे ,तब
मेरखू ह कुटाही
बाहना म फेर जाही
घेरी बेरी अईसने करबे ,तब
मेरखू ह कुटाही
ढेकी के अड़बड़ महत्तम हे
ढेकी देथे अड़बड़ गियान हे
ढेकी सिखाथे परभू धियान हे
ढेकी म छिपे बिगयान हे
ढेकी देथे अड़बड़ गियान हे
ढेकी सिखाथे परभू धियान हे
ढेकी म छिपे बिगयान हे
ढेकी म अऊ का करथे
मोला तैं बतादे आजी
संउहत करके ओमे काम
मोला आज देखादे आजी
मोला तैं बतादे आजी
संउहत करके ओमे काम
मोला आज देखादे आजी
ढेकी म मेरखू छरे जाथे
जेखर ले धान चउंर हो जाथे
कोदो कुटकी ल कुटथे
तब खायबर दाना फूटथे
जेखर ले धान चउंर हो जाथे
कोदो कुटकी ल कुटथे
तब खायबर दाना फूटथे
अइसने अड़बड़ जिनीस ल कुटे के काम आथे
कुटइया ह तब खाय के दाना पाथे
कुटइया ह तब खाय के दाना पाथे
नोनी के मन गावत हे
अऊ सुने बर भावत हे
आजी भगवान के
धियान के गोठ बतादे
मोर असुसी ल बुतादे
अऊ सुने बर भावत हे
आजी भगवान के
धियान के गोठ बतादे
मोर असुसी ल बुतादे
गोठ बात करत करत
धान ल छरत छरत
दुखीसुखी गोठियात
लइका ल पियात खवात
मेरखू ल खोवत हों
धियान देके सुन बेटी
गियान के बात सिखोवत हों
धान ल छरत छरत
दुखीसुखी गोठियात
लइका ल पियात खवात
मेरखू ल खोवत हों
धियान देके सुन बेटी
गियान के बात सिखोवत हों
सब काम करत करत
ढेकी के मूसर के रथे धियान
वइसने ये माया म जिनगी काटत
भगवान में मन ल टेकान
ढेकी के मूसर के रथे धियान
वइसने ये माया म जिनगी काटत
भगवान में मन ल टेकान
ढेंकी के कतका करों बखान
ढेंकी सिखाथे प्रभु के धियान
ढेंकी सिखाथे प्रभु के धियान
रचना - हीरालाल गुरुजी"समय"
नगर - छुरा गरियाबंद
नगर - छुरा गरियाबंद
कोई टिप्पणी नहीं:
एक टिप्पणी भेजें