पागा कलगी 29 के परिणाम

मार्च के पहिली पखवाड़ा म ‘होली हे‘ विषय म प्रतियोगिता होइस । जेमा कुल 11 रचना आइस । ये आयोजन के निर्णायक श्री तुकाराम कंसारी रहिन । कंसारीजी के अनुसार-‘‘हर प्रतिभागी के रचना ह सुघ्घर हे । नाममात्र सुधार के बाद श्रेष्ठ रचना बन जाही । उनकर सामान्य गलती लय टूटना, गलत तुकान्त, तुकान्तता के अभाव, शब्द के मात्रा बिगाड़ के लिखना हे ।‘‘ प्रतियोगिता म बिना गलती या सबसे कम गलती वाले रचना ल चुने जाथे । ये आधार म ये प्रतियोगिता के परिणाम ये प्रकार हे-
पहिली विजेता- श्री जीतेन्द्र वर्मा ‘खैरझिटिया‘
दूसर विजेता- श्री अनिल कुमार पाली

दूनों विजेता ला मंच के तरफ ले  अंतस ले बधाई, सबो प्रतिभागी मन के आभार ।

संयोजक
छत्तीसगढ़ी साहित्य मंच

पागा कलगी-30/6/जीतेंद्र वर्मा"खैरझिटिया"

दाई!जाहूँ ममा घर।

गरमी के छुट्टी लग गे,
होगे पढ़ई लिखई।
हर साल कस रद्दा,
देखत होही ममा दई।
तँउरे बर मंझनिया,
तरिया नरवा बलात हे।
ममा गाँव के सुरता,
तरवा मा छात हे।
झूलना झूलाही,
आमा बर पीपर।
दाई !जाहूँ ,ममा घर।
दाई !जाहूँ ,ममा घर।

ममा के पीठ मा,
चढ़हूँ पिठँइया ।
ममा दाउ के आघू,
नाचहूँ ताता थैया।
मामी खवाही,
बरा सोंहारी।
खाबोन पेउस,
जमने होही गाय कारी।
दू जोड़ी पेंट,
कुरथा ला धर।
दाई !जाहूँ ,ममा घर।
दाई !जाहूँ ,ममा घर।

हप्ता हप्ता हाट लगथे।
चना गुपचुप चाँट लगथे।
बड़ भाथे कोला बारी हा।
ममा दाऊ के खांसर गाड़ी हा।
थपट के सुताही ममा दई।
कहिनी किस्सा सुनाही ममा दई।
बिहना ले संझा ,
खेलबोन मन भर।
दाई !जाहूँ ,ममा घर।
दाई !जाहूँ ,ममा घर।

गड़गड़ी बॉटी ,
गिल्ली भसकोल।
बर पीपर पाना ला,
घुमाबोंन गोल गोल।
झिल्ली कागत के,
पतंग उड़ाबोंन।
खइरखा डाँड़ मा,
मजा मतंग उड़ाबोंन।
संगी सब मिल बाजा बजाबोंन।
भरे मंझनिया खूब नहाबोंन।
नइ धरे बोखर जर।
दाई !जाहूँ ,ममा घर।
दाई !जाहूँ ,ममा घर।

मामी संग पानी लान लगहूँ।
ममा दाऊ संग छानी छान लगहूँ।
ममा संग भईंस्सा धोहूँ।
ममा दाई मनाही,कतको रोहूँ।
जाके ममा गाँव,
बचपना ला लेतेंव गढ़।
दाई !जाहूँ ,ममा घर।
दाई !जाहूँ ,ममा घर।

जीतेंद्र वर्मा"खैरझिटिया"
बालको(कोरबा)
9981441795

पागा कलगी-30/5/ज्ञानु'दास' मानिकपुरी

विषय-गरमी छुट्टी मा ममा गॉव जाबो
विधा-दोहा
________________________________
सुरता मोला आत हें,आमा अमली छाँव।
होंगे छुट्टी स्कूल मा,जाहुँ ममा के गाँव।।

आथे जी अड़बड़ मजा,करथन मस्ती रोज।
मंझनियाँ भर घूमना,मामी करथें खोज।।

भाई बहिनी जुरमिलें,करथन चिहूँर चोर।
काले चुप मामी ममा,हँसय देखके जोर।।

परछी फाँदे झूलना,मिलके झूलन झूल।
ईटा हा गाड़ी बनें,उड़े चलय ता धूल।।

कहाँ लुकागे चोर हा,करे सिपाही खोज।
चोर पुलिस के खेल ला,खेलन संगी रोज।।

गिल्ली डंडा मिल हमन,खेलन संगी साथ।
बाटी राहय जेब मा,भौरा डोरी हाथ।।

टीपा हा बाजा बनय,मिलके गावन फाग।
हँसी खुसी जिनगी बितय,द्वेष रहय ना राग।।

ज्यादा बदमाशी करन,मामी अइठे कान।
भड़के नानी जोर हा,मामी के मरे बिहान।।

गाड़ी बइला मा नना,लेगय मेला हाट।
चना चबेना संगमा,खावन भजिया चाट।।

लेवय अउ कुरता नवा,जूता मोंजा साथ।
खुश होके जी हमन,चरन नवावन माथ।।

सुरता आथे बचपना ,गॉव गली अउ खोर।
मनमौजी फक्कड़ रहन,ना तोरी ना मोर।।

काबर होंगे हन बड़े,चिंता गज़ब सताय।
पेट बिकाली मा सबो,जिनगी रंग उड़ाय।।

ज्ञानु'दास' मानिकपुरी
चंदेनी कवर्धा(छः ग)

पागा कलगी-30/4/कु. रेखा निर्मलकर

बिषय- गरमी के छुट्टी म ममा घर जाबो,

गरमी के छुट्टी म हम तो , ममा घर जाबो,
आमा अमली के दिन आए, मीठ चार तेंदू खाबो,

दिखथे कहा अब बैला गाडी़ शहर के रद्दा म,
बइठ बैला गाडी़ म बरातिया जाये के मजा पाबो,

बडे बिहनिया गांव म हवा निरमल बोहाथे
नदिया तरिया के नहावई म अडबड मजा आथे,

संझा बिहनिया होथे सुख दुःख के गोठ,
पांव परे ले बडे बुर्जुग के जिनगी हर संवरथे,

रतिहा के बोरे बासी गरमी म ठंडक देथे,
मामी के रांधे चिला रोटी अडबड मिठाथे,

निचट सिधवा गांव के लइका संग बाटी भांवरा खेलन,
हमला जीता के खुश हो जथे, अइसन संगी कहा होथे,

ममा दाई रोज सुनाथे राजा रानी के कहानी,
आजा बबा सिखाथे रामायण गीता के बानी,

आथे जब घर जाये के बेरा, मया अडबड बढ़ जथे,
ममा मामी के आंखी म आंसू के धार बोहाथे,,,

कु. रेखा निर्मलकर
ग्राम कन्नेवाडा
जिला बालोद छत्तीसगढ़

पागा कलगी-30/3/विक्रमसिंह

विषय - गर्मी के छुट्टी मा जाबो ममा गांव ..

फरवरी मा पेपर शुरू होईस
मार्च मा सिराईस हे । 
पेपर के बाद स्कूल के होगे छुट्टी
ममा गांव के सुरता आईस हे ।। 1।।

सम्बलपुर के ओ पार हावे
मोर ममा गांव खेड़ा ।
साइकिल धर के आईस मोर ममा
बईठेव नहीं मै बेड़ा ।।2।।

खेड़ा ले मुरता आय रहिस
मोर ममा लेगे बर मोला ।
जूता मोजा पहीरे रहीस
मोर ममा धरे रहीस झोला ।। 3।।

घर मा आके ममा ह
दाई के पांव परिस हे ।
संग मा लाय झोला ल
भीतरी कोती धरिस हे ।।4।।

ममा कहिस दाई ल
भेज दे भांचा ल घूम के आही ।
गर्मी के छुट्टी होगे हे
अपन ममा गांव देख आही ।। 5।।

दाई ह मोला हव जा
कहिके ममा गांव भेजीईस हे ।
ज्यादा झन घुमबे बेटा
कहिके मोला चेताईस हे ।। 6।।

मोला देख के ममा दाई ह
मुच ले मुस्काईस हे ।
बने अगेस बेटा कहिके
अपन तीर मा बलाईस हे।।7।।

ओतका मा लोटा मा
पानी धर के मामी निकगे ।
हमर आरो ल सुन के
मौसी अऊ नाना निकगे ।।8।।

आ बईठ भांचा कहिके
कुर्सी मा बईठारिस हे ।
बड दिन मा आय कहिके
मोर पांव ल पखारिस हे ।। 9।।

मोर भांचा आये हे कहिके
मोर मामी ह कुकरी रांध डारिस ।
मै ओला नई खाव कहेव त
आलू भाटा ल सुधार डारिस ।।10।।

बिक्कट मजा करेव ममा गांव मा
घूम घूम के खाय हव ।
गर्मी के दिन तो रहिस हे संगवारी
तरिया मा कुद कुद के नहाये हव ।।11।।

विक्रमसिंह #लाला
मुरता ,नवागढ , बेमेतरा
7697308413

पागा कलगी-30//2//देवेन्द्र कुमार ध्रुव

गरमी के छुट्टी मा जाबो ममा गाँव...

रोज गिन गिन के बेरा ला मैहर पहांथव,
मन होगे हे अधिरहा,बेरा ले देके बिताथव,
गुनथो ऐ परिक्छा ला होवन तो दे एक घांव,
गरमी के छुट्टी मा हमन जाबो ममा गाँव....

आहूँ केहे ममा हा हमन ला लेगे बर,
अपन बहिनी अऊ दमांद ला देखे बर,
घेरी बेरी आरो पाके खोर कोती जांव,
जाना हे गाँव कहिके अब्बड़ मटमटांव....
गरमी के छुट्टी...

सबो झिन खुस रही,हमनला आही कहिके,
हांसी ठिठोली करही,भारी गदबदाही कहिके,
आवत हमनला जान,सबो हमरआरो लिही,
छानी मा बइठे कागा,जब करही काँव काँव..
गरमी के छुट्टी...

ममादाई बइठे होही हमर अगोरा मा,
नाना किस्सा सुनाही बईठार कोरा मा,
मौसी हा पुचकारही,ममा हा दुलारही,
अऊ मामी हा पानी देके,परही हमर पाँव...
गरमी के छुट्टी ....

आमा डार मा,कोयली कुक सुनावत होही,
फरगे चार,पाके तेन्दू सबो खावत होही,
बर मा डंडा पचरंगा खेलत,झुलबो लाहा मा,
बइठ सुरताये बर हे,सुघ्घर नीम के छांव...
गरमी के छुट्टी ...

रंग रंग के जीनिस ममादाई घर चुरथे,
खंगय नही कभू सबो झन ला पुरथे,
सबो मोला अपन अपन हाथ मा खवाये,
मन कथे,काला खाव अऊ काला मे बचाव..
गरमी के छुट्टी...

मोर बर नवा कुरता पैंठ लेवाहू,
अऊ मोर बहिनी बर नवा सांटी,
खेलबो दिनभर नंगत भंवरा अऊ बांटी,
चलही घेरी बेरी तिरी पासा के दांव...
गरमी के छुट्टी...

बाढ़हे गरमी ताहन तरिया मा कूदना,
रतिहा खटिया जठाये दुवार मा सूतना,
कतका मजा आथे तेला अऊ का बताव,
ममा गाँव के सुरता ला मे कभू नई भुलाव...
गरमी के छुट्टी...

लहुटे के बेरा मोर आंसू हा डबडबाही,
तीर मा बला के ममादाई,छाती ले लगाही,
फेर आबे बेटा कहिके,ओ पइसा धराही,
घर आवत आवत मे सबो ला सोरियाव...
गरमी के छुट्टी....

रचना
देवेन्द्र कुमार ध्रुव
फुटहा करम बेलर
जिला गरियाबंद (छ ग)

पागा कलगी-30//1//​ईंजी.गजानंद पात्रे *सत्यबोध*

विषय - गर्मी छुट्टी मा जाबो ममा गाँव
विधा - सार छंद।।

छुट्टी गरमी आगे भाई,ममा गाँव जी जाबो।
आनी बानी खाइ खजाना,दूध मलाई खाबो।।१

अमली पेड़ झूलना बँधही,झूले बर झूलेना।
बीच ताल मा तउड़त जाबो,तोड़े पान पुरेना।।२

पीपर पाना तुतरी बजही,खाली टीपा बाजा।
सगली भतली संग खेलबो,बनके रानी राजा।।३

कान पकड़ के ममा खीचही,करबो जब शैतानी।
हासी ठठ्ठा मामी सइही,करबो जी मनमानी।।४

सुने ममा दाई के लोरी,रतिहा रतिहा जगबो।
बढ़िया बढ़िया बात बताही,बांधे गठरी धरबो।।५

✍​ईंजी.गजानंद पात्रे *सत्यबोध*
बिलासपुर (छ.ग.) 8889747888