छत्तीसगढ के पागा-कलगी

मंगलवार, 12 जुलाई 2016

पागा कलगी-13 /27/अशोक साहू

।।माटी मोर मितान।।
------------------------------------
सब जीव खातिर अन उपजईया
मै हा नंगरिहा किसान।
धरती दाई के सेवा बजईया
माटी मोर मितान।।
जांगर टुटत मै खेती कमाथंव
बेरा लागय न कुबेरा।
होत बिहनिया बासी धर जाथंव
संझाती आथंव अपन डेरा।।
जियत किसानी मरत किसानी
मोर करम हे सत ईमान
धरती दाई के सेवा बजईया.........
नांगर बईला हे मोर संगवारी
अरा तता कईथंव धर तुतारी।
हरियर हरियर खेती खार मोर
धान कटोरा मोर महतारी।।
भाखा बोली मोर छत्तीसगढी
चटनी बासी मोर खान पान।।
धरती दाई के सेवा बजईया
माटी मोर मितान।।
अशोक साहू, गांव भानसोज
तह. आरंग, जि. रायपुर

पागा कलगी-13/26/अश्वनी सिन्हा

* मोर मयारु माटी*
मोर मयारु माटी, मोर मयारु माटी
तिहि मोर संगी अउ तिहि मोर साथी
मोर मयारु मोर माटी.................
*अब जागो रे संगी, खेती ल करौ
माटी के खातिर जिऔ मरौ।
धरम करम के बिजहा छीतौ,
मया दुलार ले मन ल जीतौ।
आज खेती करत हे-2 ,बहु बेटा अउ नाती
मोर मयारु मोर माटी.............
*कारी बदरिया गरज के बरसे,टुटे मन ह अब नई तरसे।
बंजर भुइंया अब हरियागे,सरग बनाये बर आस जागे।
छत्तीसगढ महतारी के,ये धरती महतारी के आज जुडागे छाती
मोर मयारु मोर माटी.........
*महर महर महके माटी,बड मेहनत करय साथी
माटी के उपज माटी म बाढबो,मर के माटी म मिल जाबो
माटी के मितान"अश्वनी ",जलाये प्रेम के बाती
मोर मयारु मोर माटी,मोर मयारु मोर माटी
मोर मयार माटी,मोर..................
अश्वनी सिन्हा(परसोदा)

पागा कलगी-13/25/रामेश्वर शांडिल्य

माटी के मितान

माटी म उपजेन माटी म बाढ़ें न
माटी के काया धर् हमन बाडेन
***********************
माटी हमर महतारी आय
माटी हमर चिन्हारी आय
*********************
ये माटी ल छोड़ कहा जाहाँ ग येकर कस मयारू कहा पाहा ग
***********************
ये माटी हे अनमोल संगी
येला मितान झन् बोल संगी
***********************
ये माटी म जन्मिन कतका भगवान ।
धरम करम सस्कृति हमर पहचान।
***********************
हम भारत भुईया के संतान
येखर खातिर दे देबो जान
***********************माटी दाई मितान बाबू कौन?
तेला नई बताये हे।
मै अन्नपूर्णा हव ओला हमला
सुनाये हे।
***********************
देश के माटी माथा के चदंन हे
माटी महतारी ल सादर वंदन हे
***********************
रामेश्वर शांडिल्य
हरदी बाजार कोरबा

सोमवार, 11 जुलाई 2016

पागा कलगी-13 /24/सुखन जोगी

माटी के मितान -
गोहार माटी के

सुन रे बदरा कारी
मोर गोहार हे भारी
तैं जम के बरसा पानी
मोर मितान करही किसानी

झन करबे एसो नदानी
भरपुर देबे रे पानी
बिन पानी चले नई जिनगानी
फेर कईसे होही किसानी

मोर बात के रखले तैं मानी
घटा घनघोर बरखा रानी
माटी ले माटी मिल करथे किसानी
मितान ले करहूं मितानी

नई भुखन मरन दंव नानहे लईका
सुनले खुलन नई दंव मै अकाल के फईका
घोर घोर गिरबे देहे बियासी
झन लेवय मोर मितान कोनहो मेर फांसी

दिन रात तन घुरो पछीना बोहाथे
नई देखय अपन दुख मोर सेवा बजाथे
देहंव मेहनत के फर महूं भरपुर
आबे रे बदरा तहूं लुहुर तुहुर

तहुं करले परमारथ के काम
संग दे मोला मेहनत के देहे म दाम
तोर ले नही त काखर ले गोहरांव
लिही किसनहा भईया तोर नांव

पकोबे बने घन घन ले सोनहा बाली
मितान घर आवय बने खुसहाली
मनावन देबे खुस होके होरी अऊ देवारी
झन परय दुकाल रे बरखा एसो के दारी

® - सुखन जोगी
डोड़की , बिल्हा बिलासपुर
७/७/१६

रविवार, 10 जुलाई 2016

पागा कलगी-13/23/महेन्द्र देवांगन "माटी"

माटी मोर मितान
****************
सुक्खा भुंइया ल हरियर करथंव, मय भारत के किसान
धरती दाई के सेवा करथंव, माटी मोर मितान ।

बड़े बिहनिया बेरा उवत, सुत के मय ऊठ जाथंव
धरती दाई के पंइया पर के, काम बुता में लग जाथंव

कतको मेहनत करथों मेंहा, नइ लागे जी थकान
धरती दाई के सेवा करथंव, माटी मोर मितान ।

अपन पसीना सींच के मेंहा, खेत में सोना उगाथंव
कतको बंजर भूंइया राहे, फसल मय उपजाथंव

मोर उगाये अन्न ल खाके, सीमा में रहिथे जवान
धरती दाई के सेवा करथंव , माटी मोर मितान ।

घाम पियास ल सहिके मेंहा, जांगर टोर कमाथंव
अपन मेहनत के फसल ल, दुनिया में बगराथंव

सबके आसीस मिलथे मोला, कतका करों बखान
धरती दाई के सेवा करथंव, माटी मोर मितान ।

धरती दाई के सेवा करके, अब्बड़ सुख मय पाथंव
कोनों परानी भूख झन मरे, सबला मेंहा खवाथंव

सबके पालन पोसन करथों, मेहनत मोर पहिचान
धरती दाई के सेवा करथंव, माटी मोर मितान ।

रचना
महेन्द्र देवांगन "माटी"
गोपीबंद पारा पंडरिया
जिला -- कबीरधाम
8602407353

पागा कलगी-13/22/कन्हैया साहू "अमित"

माटी के मितान~हमर किसान
************************
करम किसानी , कमिया किसान ।
माटी के मयारू , माटी के मितान ।
करम किसानी , कमिया किसान ।।
माटी के मयारू , माटी के मितान ।।

परमारथ के नाँव किसानी ,
अनदाता तैं जग बर दानी ।
जाँगर टोर महिनत तोर ,
माटी के संग तैं बदे मितानी ।।
माटी तोर गरब , माटी गुमान ।
माटी के मयारू ,माटी के मितान ।।
करम किसानी , कमिया किसान ।।१

तहीं मालिक , तहीं भुतियार ,
तोर धनहा डोली खेत खार ।
भुखे पियासे लाँघन कमा के ,
बन्जर म बगराये बहार ।।
अखन आसरा , तैं नवा बिहान ।
करम किसानी , कमिया किसान ।।
माटी के मयारू , माटी के मितान ।।२

नइ जीयाने तोला जाङ घाम ,
नून फुटे तभे चमके चाम ।
भुँईयाँ के सरवन कुमार ,
खेती किसानी तोर चारों धाम ।।
माटी तोर पूजा , माटी भगवान ।
माटी के मयारू , माटी के मितान ।।
करम किसानी , कमिया किसान ।।३

धरती दाई ला तैं सवाँर ले ,
अपन जिनगी ला खुवार दे ।
झन कर काखरो आस इहाँ ,
लहू पछीना के तैं फुहार दे ।।
माटी तोर चोला , माटी हे परान ।
करम किसानी , कमिया किसान ।।
माटी के मयारू , माटी के मितान ।।४

सुन्ता सुमत के संगी सिधवा ,
छत्तीसगढ के तहीं बरूवा ।
बैरी बिपत बर बिजार तैं ,
लगवार के दुलरू गरूवा ।।
कतका करंव "अमित" बखान ।
माटी के मयारु , माटी के मितान ।।
करम किसानी , कमिया किसान ।।५
*************@************
*कन्हैया साहू "अमित"*
हथनीपारा~भाटापारा
जिला~बलौदाबाजार.छ.ग.
संपर्क~9753322055
*************©**************
©opyright ®eserved
**************@***************
@पागा कलगी~ला पयलगी@

पागा कलगी-13/20/गोपी मनहरे

अंतरा

मै किसान सुन जवान सुख दुख भरे कहानी
जनम जनम बर बदेव जी संगी माटी मोर मितानी

पद (1)

ये लहरा कस मोर सपना छत्तीस छत्तीस टुट जाथे
आसमान ले उड़ के संगी पर्वत घलो टकराथे

लय। धरती दाई के सेवा म भईया। कर देबो कुर्बानी

जनम जनम बर बदेव.......

पद(2)

जांगर टोर करे कमाई धरती के सेवा बजाये
ये माटी हे मोर मितानी माटी ल माथ नवाये

लय। खीर तसमई कस लागे संगी। ईहा के चटनी बासी

जनम जनम बर बदेव........

पद(3)

हरियाली ल देखके संगी मन झुमर झुम जाथे
अन कुवारी जब हो जाथे कोठी घलो भर जाथे

लय। लागे सुग्घर मन ह संगी। जइसे नदीया के पानी