पागा कलगी -26//2//सुखदेव सिंह अहिलेश्वर"अँजोर"

विषय:- //आसो के जाड़//

विधा:- रुचिरा छन्द

कइसे के गोठियाँव संगी,
राम कथा इही जाड़ के।
दांत ओंठ कँपवावत दहरा,
भीतर हमागे हाड़ के।

निपटे खातिर ए दहरा ले,
नइहे कोनो जुगाड़ गा।
बुता तियारे करै न कोई,
ढचरा लगावैं ठाड़ गा।

ददा बिचारा मुंधरहा ले,
पैरा भूँसा डारत हे।
नागर बैला फाँद जाड़ ला,
लउठी धर ललकारत हे।

नान्हे बिरवा इही जाड़ ला,
जइसे खड़े अगोरत हे।
गहुँ चना संग सब्जी भाजी,
छछलत कंसा फोरत हे।

नान्हे नान्हे लइका मन ले,
जैसे दहरा हारत हे।
बाँचे बर बुधियार परानी,
झिटका भूर्री बारत हे।

खुसरे खुसरे कमरा भितरी,
बबा बिचारा झाँकत हे।
चहा ल धरके नाती बहु हा,
करत ठिठोली हाँसत हे।

टोर उवे बर चक्कर बँधना,
सुरुज ला जोजियावत हें।
बैठे सबझन आँट गली मा,
रमनिया सोरियावत हें।

रचना:-सुखदेव सिंह अहिलेश्वर"अँजोर"
'शिक्षक'गोरखपुर,कवर्धा
25/01/2017
9685216602

पागा कलगी -26//1//ज्ञानु'दास' मानिकपुरी

विषय-आसो के जाड़
विधा-दोहा (गलती ल जरूर बताहू)

1-बहुतेच जनावत हवे,आसो के ये जाड़।
तन मन हर काँपन लगे,संगे संग म हाड़।।

2-हाथ गोड़ ठिठुरन लगे,कट कट करते दाँत।
दिन तो जइसे कट जथे,मुसकुल होथे रात।।

3-गजब सुहाथे रवनिया,भुर्री तपइ मिठाय।
पानी हर चट ले करे,नाहे बर डरराय।।

4-बूढी दाई घर लिपे,बड़े फजर उठ जाय।
बाबू दाई नइ उठे,बबा गजब गुसियाय।।

5-लइका मन खेलें कुदे,जाड़ देख भग जाय।
बारी टेड़े कोचिया,तन तरतर हो आय।।

6-हाथ जोड़ बिनती करें,बूढ़ा बबा बिहान।
हे सुरुज अरजी सुनव,दरसन दव भगवान।।

7-चले हवा सुर सुर गजब,सबके मन ला भाय।
सरसों फूले देख के,तन मन हा झुम जाय।।

8-माटी के महिमा गजब,कहे 'ज्ञानु' कविराय।
तोरे कोरा हन सबो,हर मउसम मन भाय।।

ज्ञानु'दास' मानिकपुरी
चंदेनी कवर्धा(छ.ग.)

मनखे

मनमोहन छंद

मनखे के हे, एक धरम । मनखे बर सब, करय करम
मनखे के पहिचान बनय । मनखेपन बर, सबो तनय

दूसर के दुख दरद हरय । ओखर मुड़ मा, सुख ल भरय
सुख के रद्दा, अपन गढ़य । भव सागर ला पार करय

मनखे तन हे, बड़ दुरलभ । मनखे मनखे गोठ धरब
करम सार हे, नषवर जग । मनखे, मनखे ला झन ठग

जेन ह जइसन, करम करय । तइसन ओखर, भाग भरय
सुख के बीजा म सुख फरय । दुख के बीजा ह दुख भरय

मनखे तन ला राम धरय । मनखे मन बर, चरित करय
सब रिश्ता के काम करय । दूसर के सब, पीर हरय

c

//पागा कलगी 25 के परिणाम//

जनवरी के पहिली पखवाड़ा म ‘छेरछेरा‘ विषय म प्रतियोगिता होइस । जेमा कुल 8 रचना आइस । ये आयोजन के निर्णायक छंदविद अरूण निगमजी रहिन । अरूण निगमजी के अनुसार-‘‘हर प्रतिभागी के रचना ह सुघ्घर हे । नाममात्र सुधार के बाद श्रेष्ठ रचना बन जाही । उनकर सामान्य गलती लय टूटना, गलत तुकान्त, तुकान्तता के अभाव, शब्द के मात्रा बिगाड़ के लिखना हे ।‘‘ प्रतियोगिता म बिना गलती या सबसे कम गलती वाले रचना ल चुने जाथे । ये आधार म ये प्रतियोगिता के परिणाम ये प्रकार हे-
पहिली विजेता- श्रीमती आशा देशमुख
दूसर विजेता- श्री मिलन मलरिहा

दूनों विजेता मंच के तरफ ले  अंतस ले बधाई, सबो प्रतिभागी मन के आभार ।

संयोजक
छत्तीसगढ़ी साहित्य मंच

//पागा कलगी-26 के रूपरेखा//

बेरा-दूसर पखवाड़ा जनवरी 2017 तक

16 जनवरी ले 31 जनवरी तक

विषय-‘आसो के जाड़‘

विधा-विधा रहित

मंच संचालक- श्री राजेश कुमार निषाद (पागा कलगी-16 के उपविजेता)

निर्णायक-श्रीमती शकुंतला शर्मा, वरिष्ठ साहित्यकार, दुर्ग

निवेदन-‘छत्तीसगढ़ साहित्य मंच के जम्मो रचनाकार भाई मन आप सब से निवेदन हे के कविता कोनो ना कोनो विधा-शिल्प मा निश्चित होथे, ये अलग बात हे के हम ओ विधा-शिल्प ला नई जानत होबो । कुछु विधा मा नई होही त तुकांत विधा मा जरूर होही । यदि आप मन अपन रचना के विधा के घला उल्लेख कर देहू त सोना म सुहागा हो जही ।

पागा कलगी -25//8//आशा देशमुख

विषय ...छेरछेरा
विधा .....आल्हा छंद में परयास

सुन वो दीदी सुन वो बहिनी ,चल जाबो पुन्नी स्नान |
अबड़ पुण्य हे कहिथे एकर ,चलो हमू मन करबो दान |

बड़ महत्तम छेरछेरा के ,कहिथे सब वो कथा पुरान |
सबो परब पुरखा मन मानय ,हमू राखबो इंखर मान |

अनधन से सब कोठी भरगे ,टुकनी टुकनी देवे धान |
धरती दाई तोर मया मा ,हांसत खेलत हवे किसान |

लइका लोग सियान सबो झन ,किंजरय अँगना घर अउ खोर |
दर दर दर दर आवत रहिथे ,उड़े छेरछेरा के शोर |

डंडा पड़की नाचत हावय ,कुहुक कुहुक के गावय गीत |
सबो मनावय मया परब ला ,चलत हवय पुरखा ले रीत |

एक कथा बलि राजा के हे ,माँगय दान बिष्णु भगवान |
अजर अमर होगे राजा हा ,दान बनाये हवे महान |

हवे दान के महिमा भारी ,कतको किस्सा देवव सीख |
भोलेनाथ घलो हा माँगे ,अन्नपुर्णा दाई ले भीख |

भुइया हे भगवान बरोबर ,हावय हमर इही पहिचान |
हमरो संस्कृति पोठ धरोहर ,जेमा बसय धरम के प्रान |

हे विधना सब तोर हाँथ मा ,तोर रचाये हे संसार |
सबो डहर खुशयाली महकय ,तोर दया हे अपरम्पार |

आशा देशमुख
एनटीपीसी जमनीपाली कोरबा
15 .1.2017.रविवार

पागा कलगी -25//7//ज्ञानु'दास' मानिकपुरी

पागा कलगी 25 बर मोरों रचना
छेरछेरा'
~~~~

मया बाटे ले मया मिलथे।
तोर मनके नफरत मिटथे।

मन भर दया धरम कमाले।
सफल मनखे जनम बनाले।

का लेके तय आये जगमें।
का लेके तय जाबे जगसे।

आगे दान धरम के तिहार।
छेरछेरा नाचे बर तुंहर द्वार।

बड़ महत्त्व हे ए परब छेरछेरा के।
हमर संस्कृति छत्तीसगढ़ धरा के।

पूस पुन्नी म बाबा भोला ल मनबो।
मुठा मुठा धान झोला भर पाबो।

कोनों बाजा कोनों घन्टी बजावय।
कतको नाचय पारी पारी गावय।

अरन दरन कोदों दरन गावय।
तभे देबे तभे टरन गावत जावय।

मुठा भर देले नइ होवय तुंहर उन्ना कोठी।
असीस हे छेरछेरा के भरे रहय तुंहर कोठी।

झन भुलावव अपन संस्कृति अउ संस्कार ल।
जुरमिल के मनावव संगी छेरछेरा तिहार ल।

ज्ञानु'दास' मानिकपुरी
चंदेनी कवर्धा