^^देश के खातिर , जीबो ^^
देश के खातिर जीबो , मरबो देश के खातिर।
देश के खातिर तन-मन-धन. जम्मो हे हाजिर ।।
देश के खातिर तन-मन-धन. जम्मो हे हाजिर ।।
छरियाय अंगरी ल कोनो भी पकड़ टोर मडोरही ।
बंधाय मुठ्ठी म एका होही त दुसमन के पसीना छुटही ।।
बंधाय मुठ्ठी म एका होही त दुसमन के पसीना छुटही ।।
सब ले पहिली अपन घर के छरियाय एका ल जोडबो ।
फेर बैरी के छाती चढ़ ओकर घेच मरोड़बो ।।
फेर बैरी के छाती चढ़ ओकर घेच मरोड़बो ।।
हम जम्मो जभ्भे हन, जब तक देश हे ।
देश के आघू म, छोटे सबो क्लेस हे ।।
देश के आघू म, छोटे सबो क्लेस हे ।।
छोटे-बड़े, जात-पात, मजहब-धरम ल छोड़ के ।
चलबो सब संघरा खोरवा लंगड़ा ल अगोर के ।।
चलबो सब संघरा खोरवा लंगड़ा ल अगोर के ।।
न कोई तेलगू , न केरला , न कोई मद्रासी ।
कश्मीर ले कन्याकुमारी हर एक भारतवासी ।।
कश्मीर ले कन्याकुमारी हर एक भारतवासी ।।
मास्टर, मजदूर या वकील या होय बेपारी ।
गृहिणी, किसान, जवान सब देश के हे सिपाही ।।
गृहिणी, किसान, जवान सब देश के हे सिपाही ।।
छोटे बड़े सब जुर मिल करबो देस विकास ।
छल-छिद्दर, चोरी, भ्रस्टाचार के करना हे विनास ।।
छल-छिद्दर, चोरी, भ्रस्टाचार के करना हे विनास ।।
कायर बैरी घात लगाये ले के दुस्मन के आड़ ।
भारत के हर सैनिक होथे हिमालय कस पहाड़ ।।
भारत के हर सैनिक होथे हिमालय कस पहाड़ ।।
प्राण जाई पर बचन न जाई ।
कटे सर न कभू सर झुकाई ।।
कटे सर न कभू सर झुकाई ।।
पुरखा ले सीखे हन, अउ सबो ल सीखाबो ।
देश के खातिर मरबो अउ देश के खातिर जीबो ।।
देश के खातिर मरबो अउ देश के खातिर जीबो ।।
*** धनसाय यादव , पनगाव, बलोदाबाजार ***
कोई टिप्पणी नहीं:
एक टिप्पणी भेजें