पागा कलगी -33//7//जीतेन्द्र वर्मा"खैरझिटिया"

देस के खातिर जीबों
--------------------------
भाई चारा बाँटबों।
सुनता के डोरी आँटबों।
खोधरा खाई पाटबों।
इरसा द्वेस ला काटबों।
दुख पीरा ला छीबों।
देस के खातिर जीबों।

आँखी बइरी के फोड़बों।
हाड़ा गोड़ा ला टोरबों।
बइरी के गुमान लेस के।
कहलाबों रखवार देस के।
देस बर बिस घलो पीबों।
देस के खातिर जीबों।

जात पात ला छोड़ के।
मया ममता ला ओढ़ के।
देस के मान खातिर।
मोह नइहे जान खातिर।
जय जय भारत कीबों।
देस के खातिर जीबों।

हिमालय मा चढ़के।
माथ मा धूर्रा मढ़के।
सागर समुंद तँउर के।
रखबों लाज मँउर के।
भारत वासी एक रीबों।
देस के खातिर जीबों ।

जीतेन्द्र वर्मा"खैरझिटिया"
बालको( कोरबा)
9981441795