विषय:- बसंत
"'लाबो चल परघाके द्वार'"
बँबुरी हा पइरी पहिराय।
सुनके सबझन दउड़त जाय।
सुनके सबझन दउड़त जाय।
गोंदा पहिरे पींयर सोन।
कोनजनी पहिराये कोन।
कोनजनी पहिराये कोन।
परसा फूले सुरूग लाल।
चुपरे कोनो लाल गुलाल।
चुपरे कोनो लाल गुलाल।
सरसो के झूमत हे डार।
पींयर सोन पाय उपहार।
पींयर सोन पाय उपहार।
मउरे हे आमा के पेड़।
जेन ल राखे हावय मेड़।
जेन ल राखे हावय मेड़।
मउहा माते हे सिरतोन।
कोन पियाये हे रस सोम।
कोन पियाये हे रस सोम।
पुरवाही छेड़े हे तान।
जइसे मन ला मिले जुबान।
जइसे मन ला मिले जुबान।
गावत कोन मया के गीत।
जिनगी खोजत हे मनमीत।
जिनगी खोजत हे मनमीत।
आज खुशी भेंटत हे गांव।
अतका पबरित काखर पांव।
अतका पबरित काखर पांव।
कोन भरे हे अइसन रंग।
जइसे सुख दुख मिलगे संग।
जइसे सुख दुख मिलगे संग।
नंगारा नाती धर आय।
देख बबा ला खूब बजाय।
देख बबा ला खूब बजाय।
पुरवाही हा फगुआ गाय।
अरसी झुमका देय बजाय।
अरसी झुमका देय बजाय।
ये सब करनी करे बसंत।
मुच मुच हाँसय चमके दंत।
मुच मुच हाँसय चमके दंत।
ऋतु राजा हे परसिध नाव।
आय खड़े हे हमरे ठाव।
आय खड़े हे हमरे ठाव।
सब संगी ला टेही पार।
लाबो चल परघाके द्वार।
लाबो चल परघाके द्वार।
रचना:-सुखदेव सिंह अहिलेश्वर'अंजोर'
शिक्षक,गोरखपुर,कवर्धा
9685216602
15/02/2017
शिक्षक,गोरखपुर,कवर्धा
9685216602
15/02/2017
