पागा कलगी-18//10//सुखदेव सिंह अहिलेश्वर"अंजोर"

विधा:--मुक्तक

बहर-222 222 222 221 221 212
काफिया-अरत
रदिफ-हवय

(०१)
रतिहा के रिमझिम चिमनी टिमटिम तोरे अगोरा करत हवय।
चमकत बिजली गरजत बादर अड़बड़ जीवरा हर डरत हवय।।
दादू नोनी सोगे बपुरी तोरे फोटु कन गोठियात हे,
जल्दी आजा रे बेटा तै अब तो आंसु आँखी भरत हवय।।
(०२)
तोरे संसो करकर चोला हर बाती बरोबर जरत हवय।
बिन पेंदी के लोटा मन सबझन छाती म कोदो दरत हवय।।
छानी परवा बछरू गरुवा रस्ता तोर देखत रथन हमन।
जल्दी आजा रे लाला तै अब तो आंसु आँखी ढरत हवय।।

रचना:--सुखदेव सिंह अहिलेश्वर"अंजोर"
गोरखपुर,कवर्धा
9685216602

पागा कलगी-18//9//मिलन मलरिहा

नव दिनबर आबे दाई
कलजुग ल हटाबे दाई
घर घर महिसासुर खुसरे
पापी ल भगाबे दाई ॥
/
/
मिलन मलरिहा
मल्हार बिलासपुर

पागा कलगी-18//8//दिलीप

बहर--222 112 221

नागर जोत लगा ले धान। 
खातू डार बढ़ा ले धान।
पानी देख मुही दे छेक।
पाके जेन कटा ले धान। 1

बहर--222 212 2

बछरू कस मेछरा झन।
लइका तै ईतरा झन।
परही अब मोर झापड़।
आगू ते मटमटा झन। 2

दिलीप

पागा कलगी-18 //7//गुमान प्रसाद साहू

बहर-212 212 222 222 22

भाग मे जे लिखे हे ओ हमला मिलबे करही।
डोहरू फूल हर एकदिन संगी खिलबे करही।
पेड़ हम जब लगाबो आमा के जी संगवारी।
तब हमनला ग ओकर मीठा फल मिलबे करही।

-122 222 112 222
जभे मिहनत करबे ग तभे फल मिलथे।
कुंआ मेरा जाबे ग तभे जल मिलथे।
हवा कस उड़ जाबे न अकेला रहिबे।
सबो जुरमिल रहिबे ग तभे बल मिलथे।

रचना :- गुमान प्रसाद साहू
ग्राम-समोदा (महानदी)
मो. :- 9977313968
जिला-रायपुर छग

पागा कलगी-18 //6//ज्ञानु मानिकपुरी "दास"

मुक्तक-1

समझ नइ आवत हे काम सरकार के।
हवे ये मात्र के नाम सरकार के।
कभू तो हमरो लेते खबर -शोर जी
करे नइ ऐहर कुछु काम फटकार के।

मुक्तक-2

का भरोसा जिनगी के कब का हो जाही न।
देख तोला मोला ऐको दिन रो वाही न।
झन कभू करबे घमन्ड तैहा जिनगी मा रे
काल ऐको दिन आके सबला ले जाही न।

ज्ञानु मानिकपुरी "दास"
चंदेनी कवर्धा
9993240143

पागा कलगी-18 //5//देवेन्द्र कुमार ध्रुव (डी आर)

मुक्तक -1

करौ दरसन भुईयाँ के भगवान के
इही भरथय कटोरा ला जी धान के
सरी जिनगी पहाहे खेती खार मा
इही चिनहा हरे जी हमर किसान के

मुक्तक - 2
जतन करथय अपनेहा खेती खलिहान के
हमर खाना परसादे ऐकर बलिदान के
हमर दाता दुरिहा हे आजो सुख चैन ले
गजब माया दिखथे,ऐ रचना भगवान के....

रचना
देवेन्द्र कुमार ध्रुव (डी आर)
फुटहा करम बेलर
जिला गरियाबंद (छ ग)

पागा कलगी-18//4//जीतेन्द्र वर्मा "खैरझिटिया"

मुक्तक(1)
मापनी-22 22 22 221 22
तन मन करिया हेवे,मांजेल पड़ही।
मन ल मया के पाग म,बांधेल पड़ही।
थूके - थूक म थोरे,चूरहि बरा जी,
महिनत करके हाँड़ी,राँधेल पड़ही।
---------------------------------------------------
मुक्तक(2)
मापनी- 22 22 221 22
अब तो आघू,आयेल लगही।
मिल-जुल तोला,खायेल लगही।
छेल्ला घुमबे त , नई बने जी,
मिलके राज , चलायेल लगही।
------------------------------------------------
जीतेन्द्र वर्मा "खैरझिटिया"
बालको(कोरबा)
9981441795