दोहा ...
सरग नरक इंहचे हवे ,ये मनखे तैँ मान ,
जो जइसे करनी करे ,वइसे ही फल जान |
जो जइसे करनी करे ,वइसे ही फल जान |
चौपाई
बइठे हावय भीख मंगैया |हाँका पारय सुन गा भइया |
मैं आवव गा अब्बड़ दुखिया | सुन गा दाऊ ये गा मुखिया |
मैं आवव गा अब्बड़ दुखिया | सुन गा दाऊ ये गा मुखिया |
भूख पियास म तरफत हावय | गीत भजन मा मन बहलावय |
दाई माई रानी दानी | देवव मोला दाना पानी |
दाई माई रानी दानी | देवव मोला दाना पानी |
वोला सुनके नोनी आइस |थारी भर के जेवन लाइस |
सुघ्घर गोठ मया के बानी |जइसे पागय आमा चानी |
सुघ्घर गोठ मया के बानी |जइसे पागय आमा चानी |
अमरित कस जेवन हा लागिस | वो दुखिया के जीव जुड़ाइस |
ये नोनी तय हीरा बेटी | धरम करम हे तुहरे पेटी |
ये नोनी तय हीरा बेटी | धरम करम हे तुहरे पेटी |
बेटी तै अस धरमी चोला | गड़य कभू झन काँटा तोला |
जेहर हावय दुख चिन्हैया |ओकर गोठ सुने कन्हैया |
जेहर हावय दुख चिन्हैया |ओकर गोठ सुने कन्हैया |
दोहा ..
.देखय नोनी के मया ,दुखिया दिए असीस ,
ये बेटी जुग जुग जिओ , बन के राज रहीस |
ये बेटी जुग जुग जिओ , बन के राज रहीस |
-आशा देशमुख
कोई टिप्पणी नहीं:
एक टिप्पणी भेजें