पागा कलगी - 4 //दिनेश देवांगन "दिव्य"

 चित्राधारित मोर गीत

"कइसे उतरे तोर देउता"

सड़क सूना सरग के हावय, सूना हावय द्वार !
कइसे उतरे तोर देउता, बढ़गे पापाचार !!

राम भरत कस नइये भाई, नई सुदामा मीत !
नइये बेटा अब सरवन कस, होगे अइसे रीत !!
घर घर रावण बइठे हावय, नई राम अवतार !
कइसे उतरे तोर देउता, बढ़गे पापाचार !!

मनखे मनखे होगे दुसमन, पइसा के बस मोल !
हालत देखँव जब धरती के, हिरदय जाथे डोल !!
पेट भरे बर नारी करथे, अपने देह बयापार !
कइसे उतरे तोर देउता, बढ़गे पापाचार !!

लछमी माता गऊँ मात ला, मानय पहिली लोग !
माँस चीर के ओखर तन ले, करथे अब तो भोग !!
माँस खवइया दानव ले अब, भरगे ये सनसार !
कइसे उतरे तोर देउता, बढ़गे पापाचार !!

बेटी बोझ ददा बर होगे, कोख उजारे आज !
पनही समझे पग के ओला, कइसे तोर समाज !!
दाई तोर घलव इक बेटी, मानँव गा उपकार !
कइसे उतरे तोर देउता, बढ़गे पापाचार !!

काट काट के पेट ला अपन, देथें अन्न किसान !
तीपत गरमी अउ जाड़ा मा, करथे कर्म महान !!
आज झूलथे वो हर फाँसी, बना घेंच के हार !
कइसे उतरे तोर देउता, बढ़गे पापाचार !!

सड़क सूना सरग के हावय, सूना हावय द्वार !
कइसे उतरे तोर देउता, बढ़गे पापाचार !!

दिनेश देवांगन "दिव्य"
सारंगढ़ जिला - रायगढ़ (छत्तीसगढ़)
9827123316
9617880643