पागा कलगी-15 //20//जीतेन्द्र वर्मा"खैरझिटिया"

देस बर जीबो,देस बर मरबो।
------------------------------------------
चल माटी के काया ल,हीरा करबो।
देस बर जीबो , देस बर मरबो।

सिंगार करबों,सोन चिरंईया के।
गुन गाबोंन , भारत मईया के।
सुवारथ के सुरता ले, दुरिहाके।
धुर्रा चुपर के माथा म,भुईंया के।

घपटे अंधियारी भगाय बर,भभका धरबो।
देस बर जीबो , देस बर मरबो।

उंच - नीच ल , पाटबोन।
रखवार बन देस ल,राखबोन।
हवा म मया , घोरबोन।
हिरदे ल हिरदे ले , जोड़बोन।

चल दुख-पीरा ल , मिल हरबो।
देस बर जीबों , देस बर मरबो।

मोला गरब-गुमान हे,
ए भुईंया ल पाके।
खड़े रहूं मेड़ो म ,
जबर छाती फईलाके।
फोड़ दुहुं वो आँखी ल,
जेन मोर भुईंया बर गड़ही।
लड़हु-मरहु देस बर ,
तभे काया के करजा उतरही।

तंउरबों बुड़ती समुंद म,उक्ती पहाड़ चढ़बो।
देस बर जीबो , देस बर मरबो।

जीतेन्द्र वर्मा"खैरझिटिया"
बाल्को(कोरबा)
9981441795