पागा कलगी-13/36/नोख सिंह चंद्राकर "नुकीला"

//माटी के मितान गा//

तता तता बईला रेंगे
पीछू पीछू किसान गा
ये नोहे अलवा जलवा
हरे माटी के मितान गा
घाम पानी ल ये ह सहीथे
अउ सहीथे जाड़ ल
चिखला माटी ल चुपरे भईया
भोंभरा जरे पाँव गा
ये नोहे अलवा जलवा, हरे माटी के........
ये नई खावे हलवा पूड़ी
ये नई पीये कोला पेप्सी
बोरे बासी ल खाय भईया
पसिया पीये तान गा
ये नोहे अलवा जलवा, हरे माटी के.......
नई ये एखर महल अटारी
नई ये एखर पलंग पियरी
एखर टुटहा खुन्दरा भईया
झोरका खटिया बिछाय गा
ये नोहे अलवा जलवा, हरे माटी के.......
नांगर जोतथे हरिया धरथे
खेत म ये ह बिजहा बोथे
पेट ल सबके भरईया भईया
अपन रहिथे भूखाय गा
ये नोहे अलवा जलवा, हरे माटी के......
एखर धान के मोल नई हे
एखर पियाज के तोल नई हे
करजा म बोजागे भईया
माटी म मिलगे मितान गा
ये नोहे अलवा जलवा, हरे माटी के....
माटी एखर भाई बहिनी
माटी एखर दाई भौजी
माटी एखर ददा भईया
माटी एखर परान गा
ये नोहे अलवा जलवा, हरे माटी के......
ये ह देस के डाड़ी आय
ये ह देस के धोखर आय
ये ह देस के चक्का भईया
इहि ह गाड़ीवान गा
ये नोहे अलवा जलवा, हरे माटी के......
देस ह आज कहाँ बढ़गे
देस ह आज मंगल म चढ़गे
ये निसयनी के बनईया भईया
आज घलो पछवाय गा
ये नोहे अलवा जलवा, हरे माटी के....
ये ह हमर देस के नायक
ये ह हमर देस के तारक
ये ह अन के देवईया भईया
येला "नुकीला" के परनाम गा
ये नोहे अलवा जलवा, हरे माटी के.....

@नोख सिंह चंद्राकर "नुकीला"
ग्राम-लोहरसी,पोस्ट-तर्रा,
तह.-पाटन,जिला-दुर्ग(छ.ग.)
पिन-491111.